Ég hlustaði á afa stelpnanna minna segja frá því að synir Karls bretaprins hefðu á yngri árum ekki hagað sér í samræmi við sína stöðu. Hann sagði að það væri eðlilegt þeir hefðu ekki áttað sig á því hvað staða þeirra merkti. Þegar þeir hins vegar komust á þann aldur að skilja arfleifð sína breyttist allt.

Þeir áttuðu sig á hlutskipti sínu og meðtóku það. Þeir eru prinsar. Það felur í sér ábyrgð en líka forréttindi. Þegar ég las lexíu dagsins kom þessi frásögn í huga minn.

Mörg börn Guðs átta sig ekki á arfleifð sinni og hlutskipti sínu og allt of mörg hafa ekki meðtekið hver þau eru.

Hversu dásamlegt er það að geta kallast Guðs barn og hversu mikilfenglegt er að átta sig á því að maður tilheyrir andlegri fjölskyldu og hversu stórfenglegt er að meðtaka hvað það hlutskipti felur í sér.

Kastið af ykkur hryggðar- og hörmungarskykkjunni og klæðið ykkur í skart Guðs, standið upp og takið ykkur stöðu. Guð er skjól ykkar og leiðarljós sem leiðir ykkur alla daga.

Séra Díana Ósk Óskarsdóttir sjúkrahússprestur

Lofgjörðarlag vikunnar er lagið What A Beautiful Name með Travis Cottrell og Lily Cottrell. Hve fallegt nafn þitt er, nafnið þitt Jesú Kristur, konungur minn. https://www.youtube.com/watch?v=diQPE7lYNsQ&list=PLP1Btt0sboKeokDYR-yXPXEhxKFYBr89Q

Afklæð þig, Jerúsalem, hryggðar- og hörmungarskikkju þinni,
íklæðstu skarti Guðs dýrðar að eilífu.
Sveipa þig möttli réttlætis Guðs,
set höfuðbúnað dýrðar Hins eilífa á höfuð þér.
Guð mun sýna sérhverri þjóð á jörðu vegsemd þína
því að Guð mun veita þér að eilífu nafnið:
„Friður vegna réttlætis, dýrð sakir guðrækni.“
Rís upp, Jerúsalem, tak þér stöðu á hæðinni,
hef upp augu þín og horfðu í austur.
Lít börn þín sem safnað var saman að boði Hins heilaga,
þau koma úr vestri og austri,
fagnandi yfir að Guð minntist þeirra.
Fótgangandi fóru þau frá þér,
leidd burt af óvinum.
En Guð færir þau aftur til þín
og munu þau borin í vegsemd líkt og í hásæti.
Því að Guð hefur boðið að hvert hátt fjall skuli lækka,
eilífar hæðir jafnast
og dalirnir fyllast og verða að jafnsléttu
svo að Ísrael megi ganga fram í skjóli dýrðar Guðs.
Að boði Guðs munu skógar og öll ilmandi tré
veita Ísrael skugga.
Með ljósi dýrðar sinnar
og með miskunn sinni og réttlæti
mun Guð leiða Ísrael fagnandi heim.

Jesús svaraði þeim: „Varist að láta nokkurn leiða yður í villu. Margir munu koma í mínu nafni og segja: Ég er Kristur! og marga munu þeir leiða í villu. Þér munuð spyrja hernað og ófriðartíðindi. Gætið þess að skelfast ekki. Þetta á að verða en endirinn er ekki þar með kominn. Þjóð mun rísa gegn þjóð og ríki gegn ríki, þá verður hungur og landskjálftar á ýmsum stöðum. Allt þetta er upphaf fæðingarhríðanna.
Þá munu menn framselja yður, pína og taka af lífi og allar þjóðir munu hata yður vegna nafns míns. Margir munu þá falla frá og framselja hver annan og hata. Fram munu koma margir falsspámenn og leiða marga í villu. Og vegna þess að lögleysi magnast mun kærleikur flestra kólna. En sá sem staðfastur er allt til enda verður hólpinn. Fagnaðarerindið um ríkið verður prédikað um alla heimsbyggðina til þess að allar þjóðir fái að heyra það. Og þá mun endirinn koma.

Þreyið því, systkin, þangað til Drottinn kemur. Sjáið akuryrkjumanninn! Hann bíður eftir hinum dýrmæta ávexti jarðarinnar og þreyir eftir honum þangað til hann hefur fengið haustregn og vorregn. Verið þið einnig þolinmóð, styrkið hjörtu ykkar því að Drottinn er í nánd. Kvartið ekki hvert yfir öðru, systkin, svo að þið verðið ekki dæmd. Dómarinn stendur fyrir dyrum. Bræður og systur, takið spámennina til fyrirmyndar sem talað hafa í nafni Drottins og liðið illt með þolinmæði. Því við teljum þá sæla sem þolgóðir hafa verið. Þið hafið heyrt um þolgæði Jobs og vitið hvaða lyktir Drottinn gerði á högum hans. Drottinn er mjög miskunnsamur og líknsamur.