Við erum nýbúin að upplifa atburði páskanna, síðasta kvöld Jesú með lærisveinunum, svik Júdasar, afneitun Péturs, kröfu fólksins um krossfestinguna, pintingar, dauða. Og síðast en ekki síst upprisu Jesú.

Öll okkar trú er grundvölluð á því að við trúum því sem gerðist við gröfina, trú og líf kirkjunnar grundvallast á upprisu Jesú Krists. Ef það er engin upprisa þá er trú kirkjunnar einskis verð, guðsþjónusturnar tilgangslausar og allt sem við byggjum á kristninni, kristið líf, kristin trú, kristið siðferði, kristin gildi, meiningarlaust. Vegna þess að ef hann reis ekki upp frá dauðum þá er engin meining í orðinu kristin eða kristindómur.

Lærisveinarnir öðlast trúverðugleika sinn af verkum sínum, þeir hefðu getað pakkað saman og farið heim til Galíleu en það gerðu þeir ekki. Þeir höfðu fylgt meistara sínum eftir í þrjú ár án þess að líta til baka. Þeir höfðu lært og séð hluti og þeir höfðu upplifað mjög erfiðar stundir á föstudeginum langa. Meistarinn hafði verið tekinn höndum og svikin af einum þeirra, vini og félaga. Krossfestur til dauðans. Af hverju í ósköpunum hefðu þeir átt að halda því fram að hann væri upprisinn ef þeir teldu að það vera ósatt?

Ef Jesús hefði verið dáinn og lærisveinarnir hefðu ekki trúað að hann væri upprisinn hefðu þeir örugglega bara farið heim og snúið til síns gamla lífs. En allir vitnisburðirnir um upprisu Jesú eru trúverðugir, þeir eru nálægt atburðunum í tíma og segja allir sömu sögu, Jesús reis upp frá dauðum. Og síðan er það önnur saga hvernig Kristin trú hefur breytt úr sér um alla veröld, til nýrra menningarheima og nýrra tíma.

Trúir þú virkilega á þetta? Það gerist að þessari spurningu sé hent fram að fullum krafti. Eða þegar efinn kemur fram og leikur sér í höfðinu á okkur, trúir þú virkilega á þetta? Það er virkilega gleðilegt að geta svarað ákveðið – já.

Kristin trú snýst ekki um að vera með eða á móti einhverju, að trúa er kannski meira líkt því að eiga góðan vin, vin sem manni þykir vænt um og er í góðu sambandi við, vin sem maður talar við og treystir á. Það eru nefnilega ekki rök sem stjórna því hvort við séum kristinn eða ekki. Það er samband okkar við lifandi Guð sem heldur okkur í trúnni.

Í lífinu tökum við eftir að Jesús lifir. Við höfum ekki séð hann eins og við sjáum ykkur. Við höfum ekki heyrt röddu hans eins og við getum heyrt raddir annarra manneskja. En samt sem áður er enginn vafi í okkar huga að hann er lifandi. Og við erum bæði tilbúin til að standa upp hvar sem er og hvenær sem er og segja þessi fallegu orð: Jesú lifir.

Trúin er lifandi. Trúarlíf snýst meðal annars um að vera með öðrum sem trúa, í samfélagi, guðsþjónustum, biblíuhópum, bænahópum eða bara hverju því sem kristnir eiga sameiginlegt. Að lifa trúnna getur þannig snúist um að tala við Jesú, heyra sögurnar um hann og taka þátt í lífi hans alla daga. Trú er nefnilega lífsmáti, og hvort sem maður er barn, unglingur eða fullorðinn hefur maður alltaf val um það hvort maður vill trúa eða ekki.

Séra Fritz Már Jörgensson

Færið fram hina blindu þjóð
sem þó hefur augu
og hina heyrnarlausu menn
sem þó hafa eyru.
Allar þjóðir skulu safnast í einn hóp
og lýðirnir koma saman.
Hver þeirra gat boðað þetta
og skýrt oss frá því sem varð?
Leiði þeir fram vitni sín
og færi sönnur á mál sitt
svo að þeir sem heyra segi: „Þetta er rétt.“
Þér eruð vottar mínir, segir Drottinn,
þjónn minn sem ég hef útvalið
svo að þér vitið og trúið mér.
Skiljið að ég er hann.
Enginn guð var myndaður á undan mér
og eftir mig verður enginn til.
Ég er Drottinn, ég einn,
og enginn frelsari er til nema ég.
Það var ég sem boðaði, frelsaði og kunngjörði þetta
en enginn framandi guð á meðal yðar.
Þér eruð vottar mínir, segir Drottinn,
að það er ég sem er Guð.
Héðan í frá er ég einnig hinn sami,
enginn hrifsar neitt úr hendi minni,
ég framkvæmi, hver fær aftrað því?

Pistill: 1Jóh 5.4-12
því að sérhvert barn Guðs sigrar heiminn og trú okkar er sigurinn, hún hefur sigrað heiminn.
Hver er sá sem sigrar heiminn nema sá sem trúir að Jesús sé sonur Guðs?
Hann er sá sem kom með vatni og blóði, Jesús Kristur. Ekki með vatninu eingöngu heldur með vatninu og með blóðinu. Og andinn er sá sem vitnar því að andinn er sannleikurinn. Þrír eru þeir sem vitna [í himninum: Faðirinn, orðið og heilagur andi, og þessir þrír eru eitt. Og þeir eru þrír sem vitna á jörðunni:] Andinn og vatnið og blóðið og þeim þremur ber saman. Við tökum manna vitnisburð gildan en vitnisburður Guðs er meiri. Þetta er vitnisburður Guðs sem hann hefur vitnað um son sinn. Sá sem trúir á son Guðs hefur vitnisburðinn innra með sér. Sá sem ekki trúir Guði hefur gert hann að lygara af því að hann hefur ekki trúað á þann vitnisburð sem Guð hefur vitnað um son sinn. Og þetta er vitnisburðurinn: Guð hefur gefið okkur eilíft líf og þetta líf er í syni hans. Sá sem hefur soninn á lífið, sá sem ekki á son Guðs á ekki lífið.

Um kvöldið þennan fyrsta dag vikunnar voru lærisveinarnir saman og höfðu læst dyrum af ótta við Gyðinga. Þá kom Jesús, stóð mitt á meðal þeirra og sagði við þá: „Friður sé með yður!“ Þegar hann hafði þetta mælt sýndi hann þeim hendur sínar og síðu. Lærisveinarnir urðu glaðir er þeir sáu Drottin. Þá sagði Jesús aftur við þá: „Friður sé með yður. Eins og faðirinn hefur sent mig, eins sendi ég yður.“ Og er hann hafði sagt þetta andaði hann á þá og sagði: „Meðtakið heilagan anda. Ef þér fyrirgefið einhverjum syndirnar fyrirgefur Guð þær. Ef þér synjið einhverjum fyrirgefningar synjar Guð þeim.“
En einn af þeim tólf, Tómas, nefndur tvíburi, var ekki með þeim þegar Jesús kom. Hinir lærisveinarnir sögðu honum: „Við höfum séð Drottin.“
En hann svaraði: „Sjái ég ekki naglaförin í höndum hans og geti sett fingur minn í naglaförin og lagt hönd mína í síðu hans, mun ég alls ekki trúa.“
Að viku liðinni voru lærisveinar hans aftur saman inni og Tómas með þeim. Dyrnar voru læstar. Þá kemur Jesús, stendur mitt á meðal þeirra og segir: „Friður sé með yður!“ Síðan segir hann við Tómas: „Kom hingað með fingur þinn og sjá hendur mínar og kom með hönd þína og legg í síðu mína og vertu ekki vantrúaður, vertu trúaður.“
Tómas svaraði: „Drottinn minn og Guð minn!“
Jesús segir við hann: „Þú trúir af því þú hefur séð mig. Sælir eru þeir sem hafa ekki séð og trúa þó.“
Jesús gerði einnig mörg önnur tákn í augsýn lærisveina sinna sem eigi eru skráð á þessa bók. En þetta er ritað til þess að þið trúið að Jesús sé Kristur, sonur Guðs, og að þið í trúnni eigið líf í hans nafni.